Туристичка агенција Iguana Tours

Најдобриот начин да ги дознаете тајните на некое егзотично место пред да го посетите е да ги следите искуствата на оние што ги откриле. Па така, пред да заминете на прекрасниот егејски остров, Скиатос, прочитајте што би требало да побарате за да ги откриете сите скриени убавини.

Избегајте од гужвите

Доколку сте човек што сака поопуштена атмосфера, упатете се кон внатрешноста на малиот остров или пак отидете на северниот брег кој најчесто е празен, затоа што ретко кој заминува од јужниот брег каде што се случуваат сите организирани настани и каде што плажите се преполни. Уживањето во празните пространства може да биде вонсериско искуство, особено доколку сте со некоја посебна личност крај себе.


Иако се работи за мал остров, на Скиатос има голем број манастири. Но, ако сте расположени за откривање на скриените убавини, тргнете во потрага по скриениот манастир Св. Јован, до кој се стигнува по ридови, низ шуми и по тежок терен. За да тргнете натаму, прво треба да отидете до манастирот Кунистра, кој се наоѓа северно по патот од автобуската постојка број 18. Жената што се грижи за манастирот ќе Ви покаже во која насока треба да тргнете за да го најдете скриениот манастир.

Мали, идилични плажи

На северниот брег од островот има повеќе плажи. Највредни за спомнување се малите, идилични плажи: Агистра и Мала Кекира, но и „скриената“ плажа Крифи Амос. За да стигнете до оваа плажа треба да продолжите право по земјениот пат на кривината за Агија Елени. Пристапот до плажата е по релативно стрмна земјена патека, а некаде на половина пат ќе одминете и една таверна.

На карпите

Не мора да одите на плажа за да се искапите. Локалните жители пливаат на карпите во градот Скиатос, каде што речиси никогаш нема гужва. Искачете се по скалите од старото пристаниште и потоа свртете лево. При влегувањето во водата внимавајте на морските ежеви.