Туристичка агенција Iguana Tours

На спротивната страна од градот Скиатос, на истоимениот остров, се наоѓа древната населба Кастро, којашто денес е во рушевини и е совршена дестинација за авантуристите.




Населбата Кастро е средновековно утврдување кое било главно упориште на островот помеѓу 12 век и 1830 година. На страната од морето, населбата лежи на големи и стрмни карпи коишто оневозможуваат напад по вода, а дел од копнените ѕидини се останати и до ден денешен, заедно со некои од поголемите артефакти од славното минато на населбата.

Во најдобрите времиња, населбата била сочинета од 300 куќи и 22 цркви. Во денешно време многу малку од нив сè уште стојат, но затоа има неколку приватни куќи кои се во целост реставрирани. Кога ќе пристигнете на ова место со магичен поглед, разгледајте ги сите рушевини, но не заборавајте да ја посетите и малата црквичка во средината на населбата.

Со оглед на тоа што се работи за релативно мал остров, можете да пешачите од градот Скиатос до Кастро, по добро обележаната патека. На моменти патеката е малку стрмна, па со умерено темпо ќе Ви бидат потребни околу три часа во еден правец. Доколку не сте љубител на пешачењето, можете да тргнете со изнајмен автомобил или со организирана туристичка тура со џип од градот Скиатос, но и со овие опции, повторно ќе мора да ги пропешачите последните 15 проценти од патот, за да стигнете до дестинацијата. Но, кога ќе стигнете, ќе сфатите дека вредело.